أربع عيون وكل أبوهن علـى مـاش

أربع عيون وكل أبوهن علـى مـاش
تشوف لكـن عـن وفَقّهـا معصوبـة
عمرك سمعت بواحدٍ ما بعد عـاش..!!
وان عاش نوبة مات عشريـن نوبـة
تعال أسولف لـك سواليـف حشـاش
وأخَبِرك قلـب العنـا وش لقـوا بـه
يوم فتحوه وقالوا: أبيض من الشـاش
وإستغربوا الكتابـة اللـي قـروا بـه
محفور به إسمك من الجاش للجـاش
ومرسوم به سيفين .. نخله .. عروبة
احدٍ يقول ان عاش يبغى لـه إنعـاش
واحدٍ يقول إن عاش هـذي إعجوبـه
يحب له ناس مطرهـم يجـي نشـاش
والأرض عطشـى والليالـي لعـوبـه
لا بوك حظ كـل مـا القـاه ينحـاش
وان قلت لـه قال:الأقـدار محسوبـة
لو تسلم الدنيا مـن "كليمـة" الـواش
كـلٍ محصـل غايتـه فـي دروبــه
يا المسلم اللي صلفي بإيدينه هِشـاش
ويا الغايب اللـي مالـه احـدٍ ينوبـه
عجزت أتذكر يا قمر صورتـك كـاش
وجَمّعتها من مهجتـي فـي صعوبـه
الله يجيبـك لـو تهاوشنـي هـواش
أنا اشهـد إن غيابـك أكبـر عقوبـه
وإن القلوب اللي تعاديـك مـا هنـاش
وان الشفايا اللي حكـت بـك كذوبـه
وان النصيب اللي خلا منك ما حـاش
وان العصور اللـي سبقتـك مغلوبـه
نم ... لا ياعسى نوم العوافي لك فراش
وغطـاك رمشـي والغـلا والعذوبـة
دامي بقلبك والزمـن طـاش ماطـاش
ما هقوتي تصحين غيـر .. مغصوبـة