قصيده في وصف الجمس.....

قم يانديبي فـوق جمـس مصمـم
بالكمبيوتـر ماتجيـبـه وكـالـه
تصميم عام الفيـن للحيـن ماتـم
لكـن هـذا عينـه جـاء لحالـه
اهـدوه لكلنتـون وقـام يتبـسـم
وقال ارسلـوه لنـور دار العدالـه
وجابـوه هديـة للمليـك المعظـم
فهد زعيم العرب وافـي الجمالـه
وجاني خبره ورحت عجل ومهتـم
لقصر من كل العرب فـي ظلالـه
وجيت الوزير وقلتلـه لـو تكـرم
ودي اشوف الجمس واوصف جماله
قال العفو نستئذن اللي لـه العلـم
يرجع وشـوره دايـم فـي دلالـه
عبدالعزيزبن الفهـد جالـي الهـم
المستشار اللـي يشـرف مجالـه
ودخلت انا وياالوزيـر المخضـرم
في مجلس رحـب تخالـف دلالـه
وجيته وهو جالس ووقـف وسلـم
ورحب وأذن لي بأني اجلس قبالـه
وأبديت له سر على النـاس يكتـم
وقال الـذي تبغيـه سهـل منالـه
ودعى الوزيـر وفـي ذنـه تمتـم
وفينـي ركـز نضرتـه بالعمالـه
وفهمـت وش قالـه جعـل يسلـم
عطانـي اللـي مايعيـن بـدالـه
يعطي العطاء من للمعالـي بسلـم
يرقى سنـود وعزتـه راس مالـه
واقفيت بااللي مـن نضرلـه تألـم
حتى هل المرسدس عـدوه عالـه
ولحق بشره مانكشخ فـوق بـي ام
صابه جفال وعاف غالـي حلالـه
وتعالموبـه كـل كافـر ومسلـم
وكلن شغل بالجمس فكـره وبالـه
وجاني الجميح وقالي بس قل كـم
مليون كاش ومثلهـا لـك حوالـه
قلت الذهب هذا على البيـع حـرم
وبهديه للـي يمدحـه مـن عنالـه
وناديت من ربعـي غـلام تعلـم
على عبور الحـد وقـت الجهالـه
ثم قلت ياصبـي الصمايـل تولـم
علـى الـذي ماجانـا بالسهـالـه
جمس يهوم المدح ويحـارب الـذم
مهجـن يحيـي قلـوب اشتغالـه
امـه ترايستـار وابـوه جـي ام
واكثر طبوعه من طبايـع خوالـه
مصممينـه للفضـاء قبـل يفطـم
يوم فطموه قالت الارض انـا لـه
كن حس سلفـه لاغمزتـه ورنـم
ضحكه صغير يدرج وسط صالـه
ولافي سيوره صوت عـود تهشـم
يوم اقفوا الغازين بأغلـى حلالـه
وإلا اشتغل كن بقـزوزه مترجـم
يحكي فرنسي عن ظروف البطالـه
لكـن شكامينـه الامـن تــرزم
بيدين سبـاح هـوى مـن سقالـه
مكينتـه كنهـا بـريـق ملـغـم
فوقيه احمر والبلاء فـي الحثالـه
لجه لحي الغـوج لا منـه سجـم
في حس كبوته اليـاء غـط جالـه
شبكه يجادي رشرشن فوق محـزم
على كما التفاح من تحـت شالـه
لكن مراياته اليـاء اقفـى موشـم
في اذنيـن ريـم ذيرتـه الذعالـه
شنابر قـزوزه حجـول بمعصـم
سوداء تهيض بالطبـل كـل دالـه
رفارفـه كنهـا ركـوح المقطـم
وكنه قزاز البرق لاانشـق خيالـه
سيته يضم اللي على طارته ضـم
ام تضـم وليدهـا مـن دلالــه
كنها احتوته بحضنها هنـد رستـم
او بنت صدقي قمـه الفـن هالـه
وكنه مع القـاع العتـش لاتهنـدم
هرش مع الغفران تومـي حبالـه
مقدامه الياء اقفى يخم الشمع خـم
عجزت بالتوصيـف القـى مثالـه
يشابه لسكـران يلاغـي ويحشـم
ولا عــود مزعليـنـه عيـالـه
ساعة تشوفه تحسـب انـك تحلـم
حيث ان الذي صممه موسع خياله
عليه يالمندوب في الليـل الاظلـم
إسرو عسى التوفيق للزيـن فالـه

للشاعر المبدع/ضيدان بن قضعان
منقووووووووول

صح لسان الشاعر

مشكور على النقل

تقبل مروري

مــــــــــــــــشـــــــــــــــــكور
عـــــــــــــــــــــلـــــــــــــــى
الــــــتواصـــــــــــــــــــــــــــل

» قصيده في الجمس...........
» قصيده في وصف النيسان...